مقالاتي
أنت دمك خفيف ؟!!
السؤال دة مش مهم إذا كنت في حاجة إلى كيس دم لتنقذ بيه حياه من تحب. طيب المهم أية !!؟
بالتأكيد انك تلاقى الفصيلة المناسبة. البشر فيهم فصائل دم كتير, أكثر من 100 فصيلة نادرة الوجود. و 30 فصيلة أخرى أكثر انتشارا؛ ويبقي أربع فصائل مهيمنين لازم تعرف أنت مين فيهم B , A , AB , ولا O ؟ و ما تسألش مين فيهم دمه خفيف أو أحسن أو أرقى؟ كلهم زى بعض بالضبط حتى دم الراجل ذي دم الست.
و كل واحد محتاج دم بياخد من اللي شبهة بالضبط و في حالة التعذر وجدنا انك ممكن و كل الفصائل
كمان تأخذ دم من الفصيلة O ؛ وعشان كده سميناهم معطى عام (يعنى كريم) و دا طبعا مالوش علاقة بالكرم اللي إحنا عارفينوا. اما اللى فصيلتة AB فهو بياخد من كل الفصائل ( مستقبل عام) و لا يعطى إلا لشبيهة و دا مش معناه انه بخيل بالطبع.
و إذا كنت مقبل على الزواج ماتنساش انك تحلل عامل الريسيس Rh و تعرف دمك موجب و لا سالب. لان دة ممكن يأمن حياة أطفالك في المستقبل!! و مرة تانية ما تسألش مين الاحسن الموجب ولا السالب كله رائع و ذي بعض بالضبط. المهم تعرف المعلومات دى عشان لو احتجت دم ليك أو لأي حد بتحبه تعرف تساعد الأطباء و الفنيين. و في كل الأحوال احنا مش بنحدد فصيلة دمك من كلامك بس. لكن هنعمل كل التحاليل من جديد اذا احتجت لذلك لان حياتك غالية وبتهمنا ولازم بأذن الله نحافظ لك عليها.
و في النهاية ... اقسم بالله أني أعرف ناس بتغيير دمها باستمرار وكمان والله بتغيير جلدها !!!!! – ما تفهمنيش غلط – قصدي كل الناس بما فيهم أنت, جسمك بيبدل و يصنع دم جديد كل أربعة شهور. وعشان كده بنصحك تتبرع بدمك كل ما تقدر بس مش أكتر من مرتين في السنة ودي صدقة جارية تنقذ بيها حياة إنسان.
" مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا وَلَقَدْ جَاء تْهُمْ رُسُلُنَا بِالبَيِّنَاتِ ثُمَّ إِنَّ كَثِيرًا مِّنْهُم بَعْدَ ذَلِكَ فِي الأَرْضِ لَمُسْرِفُونَ" )32) سوره المائدة
د. علاء الدين صلاح الدين
أستاذ مشارك - قسم المختبرات الطبية
الملفات المرفقة
- انت دمك خفيف (انت دمك خفيف.docx - B)
